BISEDË ME REKTORIN E UEJL, AKADEMIK ALAJDIN ABAZI
UEJL është një projekt shumë i suksesshëm i pranuar në SHBA dhe Evropë

     Sistemi trevjeçar është i njëjtë me atë katërvjeçar, ngase është po i njëjti titull që jepet gjatë diplomimit. Do të ishte më mirë që studentët të zgjedhin sistemin 3+2

Box:
Para se të themelohet Universiteti i EJL, akademik Alajdin Abazi ka punuar profesor (nga viti 1968), pastaj edhe dekan i Fakultetit Teknik në Prishtinë. Akademik Alajdin Abazi udhëtuar shumë nëpër botë, sidomos në SHBA dhe vende të tjera të Evropës, duke arritur që të fitojë një përvojë të madhe sferën e shkencës dhe lidershipit akademik. Tetova është vendlindja e rektorit Abazi, të cilit edhe iu besua që të jetë në ballë të një projekti shumë të rëndësishëm, siç është UEJL.

Euroidea: Zoti rektor, viti i ri akademik, tashmë ka filluar. A shkoi çdo gjë sipas plan-programit të paraparë për ketë vit akademik?
Rektori Abazi: Në radhë të parë, interesimi ka qenë i konsiderueshëm, ku u regjistruan një numër i madh i studentëve, numër ky, të cilin në njëfarë mënyrë edhe e kishim paraparë, edhe pse në disa drejtime ka një zvogëlim të numrit të studentëve, kurse në disa drejtime ka rritje të këtij numri. Si shkak i këtij zvogëlimi në këto drejtime, mund të jetë mosinformimi i mjaftueshëm, marketingu i paktë, ose edhe vetë konkurrenca mund ta ketë bërë të vetën, duke bërë që studentët të zgjedhin fakultete të tjera. Në përgjithësi, jemi shumë të kënaqur me numrin e studentëve të regjistruar në UEJL. Viti akademik filloi dhe si në Tetovë ashtu edhe në Shkup, gjithçka ishte në rregull.

Euroidea: Studentët ende nuk janë të informuar mirë lidhur me sistemin 3+1+1. Mund të na e thoni qëllimin e aplikimit të këtij sistemi dhe ajo që është e rëndësishme të dinë studentët?
Rektori Abazi: Në Maqedoni, një numër i madh i universiteteve u transformuan në sistemin 3+2, ndërsa disa të tjerë vazhduan me sistemin e vjetër 4+1. Studentët, duhet të kenë parasysh se sistemi trevjeçar është i njëjtë me atë katërvjeçar, ngase është po i njëjti titull që jepet gjatë diplomimit. Poashtu, me këtë rast, do të ishte më mirë që studentët të zgjedhin sistemin 3+2, në vend të 3+1. Studimet 3+1, pra një vit plus, janë studime specialistike, kreditë e të cilave janë të vlefshme në vazhdimin e magjistraturës si 3+1+1.

Euroidea: UEJL deri më tani ka pasur një bashkëpunim evident me shumë universitete në botë, në rajon dhe në vend. Z. Rektor, a mund të thoni se me sa universitete janë lidhur marrëveshje bashkëpunimi?
Rektori Abazi: Në përgjithësi, kemi tentuar që të kemi marrëveshje bashkëpunimi me të gjitha universitetet me renome. Bashkëpunimin e kemi ndarë në katër nivele, duke filluar në radhë të parë me Shtetet e Bashkuara të Amerikës, ku siç e dinë të gjithë, kemi patur bashkëpunim shumë të mirë me Universitetin e Idianës, ku kemi fituar eksperiencë shumë të madhe në të gjitha aspektet e veprimtarisë së universitetit. Me këtë rast të përmendi atë se si menaxhohet mësimi përmes softuerit"Angel", pastaj themelimi i Qendrës së karrierës, Qendrës për zhvillimin e biznesit etj. Në grupin e dytë të bashkëpunimit ndëruniversitar është Evropa Perëndimore, ku kemi patur dhe vazhdojmë të bashkëpunojmë me disa universitete, duke filluar me universitetet në Francë, më së shumti, pastaj Zvicrrën, Austrinë, Gjermaninë, Italinë dhe Belgjikën. Në Belgjikë kemi bashkëpunim me Universitetin e Gent-it, në Francë me Universitetin e Nicë-s, në Gjermani me Universitetin e Bambergut, ku bashkëpunojnë fakultetet e biznesit. Në grupin e tretë, kemi radhitur bashkëpunimin universitar rajonal, ku bëjnë pjesë universitetet nga Shqipëria, Kosova, Turqia, Kroacia, Bullgaria, Greqia etj. Ndërkaq, në grupin e katërt bëjnë pjesë universitet në RM. Bashkëpunimi me këto universitete nuk zhvillohet në të njëjtën kohë dhe as në lëmi të njëjta, por varësisht nga nevojat...

Euroidea: UEJL nga ky vit akademik ka disperzuar disa fakultete dhe programe studimore edhe në Shkup. Si lindi ideja dhe cili është qëllimi?
Rektori Abazi: Hapja e Universitetit të Evropës Juglindore edhe në Shkup ka për qëllim që shqiptarët e Shkupit dhe të Kumanovës të jenë sa më afër Universitetit. Ka patur interesim të theksuar që të bëhet regjistrimi i studentëve edhe në Shkup. Mund të them se të gjitha investimet që janë bërë mund t'i kompensojmë. Ne, e kemi bërë edhe një projekt të nevojshëm (projekt ideor) për të ardhmen e Universitetit në Shkup, përkitazi me hapësirën ku do të vendoset Universiteti i Evropës Juglindore. Presim që komuna e Sarajit, në radhë të parë, të bëjë ndërrime në planin urbanistik dhe pastaj presim që Qeveria e RM të nddajë tokën për ndërtimin e një qyteze të re..

Euroidea: Zoti Abazi, ky është mandati juaj i dytë si rektor i UEJL. Mund ta na e shpalosni sekretin e suksesit Tuaj?
Rektori Abazi: Është një sukses i përbashkët, pra nuk mund të arrihet vetë ky sukses, pa bashkëpunim... UEJL është një projekt shumë i suksesshëm, të cilin në Evropë dhe në Amerikë e lavdërojnë. Pra, këtë sukses do të dëshiroja që ta ndaja si sukses i gjithëmbarshëm, i cili është ndihmuar edhe me inkuadrimin e partnerëve të jashtëm, SHBA-ve në radhë të parë dhe shteteve evropiane.

Euroidea: A e lexoni revistën universitare ''Euroidea''?
Rektori Abazi: E lexoj rregullisht. Tani keni patur pauzë dhe tani pres që të dalë numri i parë dhe me siguri se me të edhe kritikat e para do të vijnë. Mirëpo, me daljen e Euroidesë gjallërohet edhe Universiteti, për shkak se edhe Euroidea paraqet një vlerë të rëndësishme për UEJL.

Euroidea: Dhe për fund, cila është porosia juaj për studentët e UEJL?
Rektori Abazi: Të jenë të suksesshëm dhe të shfrytëzojnë sa më shuam që të jetë e mundur atë që ofron universiteti, sepse vetëm kështu do ta arsyetojnë këtë investim kaq të madh të prindërve të tyre. Dihet se si është struktura sociale tek ne, por dëshira për t'i shkolluar fëmijët nuk mungon dhe prindërit janë ata që investojnë në ardhmërinë e fëmijëve të tyre. Studentët tanë kanë kushte të mira për studime dhe duhet të shfrytëzojnë gjithçka që ofron Universiteti. Qyteza universitare, ka një pamje më ndryshe nga universitet tjera, prandaj edhe shumë studentë duhet të ndiejnë kënaqësi dhe t'i përkushtohen më me zell studimeve.

Biseduan: Vullnet Dauti
                Yllzana Murati
                Samira Doko