STUDENTËT BALLKANIKË DHE EUROPIANË BËHEN BASHKË NË "SUMMER SCHOOL 2010", NË UEJL
 

Departamenti për përpilim të projekteve pranë Unionit të Studentëve të UEJL-së, aplikon me projekt propozim për të organizuar Universitet Ndërkombëtar Veror (International Summer University) në Kampusin universitar të UEJL-së.

Ideja kryesore prapa këtij organizimi është që të shfrytëzohet rasti në fjalë në mënyrë që të kemi në dispozicion falas një numër të madh të profesorëve eminentë nga Europa perëndimore, SHBA-të dhe më gjerë. Me këtë, studentët tanë bëhen pjesë e rrjetit ndërkombëtar të transferimit të dijes në forma moderne të mësimdhënies. Përfitimet janë të shumëanshme. Studentët pajisen me dije të reja shumë nevojshme për ngritjen e tyre të mëtejshme akademike dhe aq shumë të kërkuara në tregun e punës si lokal ashtu edhe në ata global. Profesorët vendorë përfitojnë njohuri të reja në lidhje me format bashkëkohore dhe interaktive të mësimdhënies nga vendet respektive prej ku vijnë profesorët e nderuar. Por edhe vizitorët e huaj shfrytëzojne kapacitetet intelektuale të mësimdhënësve dhe studentëve vendorë në një “joint venture” të sukseshme të shkëmbimit të dijes.

Një motiv tjetër i cili e shtyu Unionin e Studentëve pranë Universitetit të Europës Juglindore që të përpiqet me të gjitha forcat dhe kapacitetet e veta në drejtim të realizimit të këtij organizmi ishte edhe mungesa e këtij mësimi joformal shumë të sukseshëm që praktikohet me të madhe në vendet e zhvilluar të Bashkimit Europian dhe më gjerë.

Një arsye shume emergjente në përpjekjen në fjalë ishte edhe informacioni që morëm sipas të cilit vendi rezikon të humbë mundsinë e organizmit të shkollave të këtilla verore. Kjo shkaku i skadimit të planit strategjik të organizatës holandeze, “SPARK”, e cila organizoi shkollat verore në fjalë për katër vite radhazi.

Me këtë rast, US – UEJL, si organizatë përfaqësuse e interesave të studentëve, përmes Departamentit të përpilimit të projekteve përgaditi një propozim-projekt me të cilin aplikoi në departamentin për Mbështetje të Arsimit (EACEA), e cila funksionon nën ombrellën e tre Drejtorive të përgjithshme që janë pjesë përbërëse e Komisionit Evropian. Propozim-projekti është tashmë duke u shqyrtuar nga organi në fjalë e nga ana tjetër Unioni i Studentëve pranë UEJL-së, është optimist në pritje të një përgjigjeje affirmative, duke u bazuar në plotësimin e standardeve të kërkuara,  si dhe nga shkaku se është organizata e vetme nga mbarë vendi që aplikon për një aktivitet të tillë.

Për të qenë më afër çështjes në fjalë,  kërkuam informacione më të detajuara nga Kryetari i Unionit të Studentëve të UEJL-së, z. Agon Ferati. Sipas tij, qëllimi kryesor i këtij projekti është nxitja e bashkëpunimit akademik në nivele kombëtare, rajonale dhe ndërkombëtare. Organizimet e tilla nxisin bashkëpunim studentor; u ofrojnë mundësi studentëve tanë të ndjekin ligjerata nga profesorë të njohur botërorë; shërbejnë si një mundësi e mirë për të krijuar një network të studentëve nga vende të ndryshme si dhe shërbejnë për të zgjeruar njohuritë, kuptuar më mirë dhe ndihmuar në zbatimin efiçent të Procesit të Bolonjës tek ne.

Nëse gjithcka shkon sipas planeve, shkolla do të organizojë 8 kurse intensive verore në gjuhën angleze me profesorë-ligjërues të huaj. Prej tyre, 4 prej tyre parashihet të jenë ligjërues të nivelit të lartë të cilët në sfera të ndryshme akademike kanë  themeluar dhe të promovuar teori origjinale të vetat.

Profesorët do të kenë ndihmë dhe bashkëpunim nga 8 asistentë-profesorë të tjerë vendës nga të gjitha Universitetet ekzistuese në Maqedoni, duke përfshirë edhe UEJL-në. Përpos kurseve, studentët do të kenë mundësi të ndjekin edhe dy debate publike në temat: “Procesi i Bolonjës – Iniciativa për standardizim të arsimit sipëror në Europën Juglindore”, Sukses apo Dështim?, si dhe një temë tjetër e cila do të zgjidhet mes dy propozimeve në vazhdim: “Të drejtat dhe liritë e njeriut në shtetet e Europës-Juglindore” dhe “Toleranca në shoqëritë në tranzicion”.

Përpos pjesës akademike nuk do të mungojnë as aktivitetet zbavitëse, ahengjet, ekskurzionet dhe kompeticionet sportive në diciplina të ndryshme. Projekti përfshin edhe work-shops apo punëtori për çështje të ndryshme praktike. Gjithashtu, duke pasur parsysh se aty do kemi një numër të madh të studentëve nga Universitet tjera,e kemi planifikuar të bëjmë një prezantim dinjitoz të aseteve të Universitetit tonë i cili do të ju ofrojë mundësi gjithë vizitorëve të shohin se çështë UEJL dhe çfarë ofron ai.