Gazetari përgjumur akuzon studentët!


Reagim:

Lidhur me shkrimin e Gazettës suaj të datës 11 shkurt, të gazetarit z. Arben Zeqiri me titull “Studentët po flenë gjumë”.

Në të cilin shkrim është manipuluar në mënyrën më të paturpshme me kinse deklaratat e dy kryetarëve të dy shoqatave joqeveritare “Realiteti” dhe “Illyricum Libertas” të cilët gazetari i juaj i pyet përmes telefonit të prononcohen për Organizatat e studentëve. Ajo që dëshirojmë t’ia përcjellim opinionit të gjerë por edhe gazetarit tuaj si edhe gazettës suaj lidhur me këtë, është:

Pikë së pari ky shkrim për nga niveli është jashtë çdo standardi gjuhësor për komunikim publik: duke filluar nga titulli e deri në fund. Po jua themi troç se nga ne si lexues nuk e keni lejen që të na terorizoni deri në këtë masë me shkrime të këtilla. E themi këtë sepse me hartime të këtilla ne nuk mund të regjistrohemi as në shkollë të mesme se jo më në Universitet, apo të marrim notë kaluese. E shfrytëzojmë rastin të jua themi këtë sepse me shkrime të këtilla ulet standardi kulturor i krejt një kombi dhe ne nuk mund të jemi indiferent ndaj kësaj dukurie. Pra, ne jemi ata që duhet të kërkojmë përgjegjsi nga gazetari i juaj e jo ai nga ne.

Së dyti: ky shkrim është jasht çdo standardi professional të gazetarisë. Gjithashtu jasht çdo parametri të etikës gazetare. Po habitemi se si Redaktorët e Gazetës lejojnë gjëra të këtilla që e ulin tepër poshtë edhe besueshmërinë e vetë gazetës. Këto janë gjerat fundamentale profesionale me të cilat një mjet informimi duhet ta fitojë “kreditin” për fjalën e lirë. Nuk besojmë se në këto gjëra fundamentale të profesionit ju përzihet dikush.

Së treti: si tema ashtu edhe esenca e këtij shkrimi janë vetëm një manipulim, ku merren fjalët e një muhabeti për telefoni dhe radhiten sipas qejfit me prapavijë të caktuar. Si duket gazetari i juaj nuk ka tjetër detyrë përveç se të thirre në telefon njerëz dhe me muhabete të lira telefonike ta mbushe normën e tij si gazetar. Gazetari i juaj nuk i ka marrë këto prononcime as në ndonjë Konferencë për shtyp të prononcuesve e as në ndonjë formë të ligjshme. Kështu as gazetari lodhet as gazeta ka shpenzime, të gjitha bëhen prej telefoni dhe shtyllat mbushen vetëm me fjalët e tjerëve.

Së katërti: nuk shohim kurfarë logjike që gazetari të kërkojë prononcim të OJQ-ve për punën e organizatave studentore e as OJQ-të kanë pse të prononcohen lidhur me këtë.
Askush nuk ka të drejtë të prononcohet në këtë mënyrë për tjerët përveç se për punën e vet. Ndërsa sa u përket studentëve ata para së gjithash u përgjigjen prindërve të vet që po i financojnë me shumë sakrifica dhe askujt tjetër. Prandaj gazetari i juaj logjikisht duhet të kërkojë prononcime nga prindërit tonë lidhur me ne. Pra ne duhet të mësojmë sa më shumë dhe të mbarojmë provimet sa më parë, që të punësohemi dhe pastaj të marrim përgjegjsi të vërteta. Ndërsa Organizatat e studentëve janë formuar dhe funksionojnë mbrenda Universiteteve me qëllim që studentët të mund t’i realizojnë të gjitha të drejtat për studim dhe të drejtat tjera që u takojnë. Edhe pse Organizata e jonë e studentëve ballafaqohet me shumë probleme të mbrendshme dhe natyrisht humbim shumë kohë për këtë, megjithatë përpiqemi të jemi së paku solidar me ata që kanë përgjegjsi më të mëdha se ne, ndër ta edhe OJQ-të e përmendura. Veçanërisht ne si Union i Studentëve të UEJL-it kemi bashkëpunuar dhe gjithmonë jemi solidarizuar me iniciativat e OJQ-ve të përmendura. Prandaj nuk shohim arsye që ata duke e ditur se studentët tani janë në kohën e provimeve dhe të shpërndarë, të përfitojnë nga rasti të na akuzojnë në këtë mënyrë. Ne thjeshtë nuk e besojmë këtë se këto OJQ janë prononcuar kësisoji. Por edhe nëse po ne nuk kemi ndonjë përgjegjsi ndaj tyre, si po mendon gazetari juaj.
Përveç kësaj, po ia përkujtojmë këtij gazetari si edhe të gjithë atyre që ende nuk e dinë se ky popull 20 vite me radhë për çdo dy vite e bile edhe më shpesh ka dalë në zgjedhje dhe ka votuar përkatësisht ka zgjedhur njerëz të cilët e kanë kërkuar votën tonë pët të marrë përgjegjësi shumë të mëdha: t’i përfaqsojnë interesat e krejt një populli(deputetë, ministra, drejtorë, etj, etj). Ky popull e paguan shumë shtrejt luksin e tyre. Ky popull gjithashtu paguan edhe shumë intelektualë, institucione e organizata tjera prej të cilëve duhet të kërkojë përgjegjsi, përpara se të kërkojë prej studentëve. Pra borxh mund të kërkoni vetëm atje ku keni me marrë.

Pra e nderuara Gazetë, këto “prononcime” të gazetarit tuaj nuk janë prononcime por manipulim me prapavijë të menduar mire. Prandaj kjo mënyrë e marrjes nëpër gojë të studentëve dhe kërkimi përgjegjsi nga ata pse nuk i bëhen nënë e babë krejt një populli, nuk është vetëm formë infantile mentale por diçka më keq. Studentët vërtetë gjithmonë kanë qenë pararendës të historisë por të drejtën për të kërkuar nga ata atë që duhet ta bëjnë tjerët, nuk e ka askush.

Ndërsa kjo mënyrë e manipulimit me prononcime është jo për reagim por për ndjekje penale.

Me Respekt,
Unioni i Studentëve të UEJL-it